ضحكة القلب الحزين

ضحكة القلب الحزين
يا قلبى ليه بتضحك وانت حزين ؟
يا عيونى ليه بسمتك حاسسها أنين ..
الدمع فيها حاير.. يستخبى فين ؟
يا ناس مش كل الضحكة الحلوة ..
تبقى برنين ..
أوقات الضحك يبقى أمر م البكا
والدمعة م الفرح تسيل ع الخدين ..
أما أنا .. شايل همى بين ضلوعى .. وصابر
ماشى بقلبى .. ينزف ف دم يروى جناين
والعقل م الفكر حاير ..
كل ما يهرب من همه
يلاقى الحجر عليه .. داير
ويصبر ف نفسه .. لما عمل م الصبر ضفاير
يا ترى يا دنيا فيكى أمل ؟
وللا أنا بالوهم متغمى ؟
شايل هموم الناس ..
وأنا مين يشيل همى ؟
داويت كتير فى جروح ..
و أنا مين يداوى جرحى ؟
يا ما صبرت قلوب ..
و أنا مين يصبرنى .. ؟